كتب دكتور/ صبحي الشافعي
تعيش طوال حياتك وسط مجموعة من البشر غرباء او أقارب المهم انه يحيط بك في حياتك أناس كثيرة منهم من هو قريب منك أي تحب ان تراه باستمرار ربما يكون والدك او والدتك وربما يكون ابنك او بنتك وربما تكون زوجتك ... الخ من الافراد المحيطة بك فهل سالت نفسك يوما ما هل من بين هؤلاء من يحبني بالفعل حب حقيقي مثل حب الانسان لأخيه الانسان طيب هل الجميع يحبني ام يقتصر الامر فقط على مجموعة الأقارب كالأب والأم؟
لا شك ان الدخول لقلوب البشر هو امر غاية في الصعوبة فقد طغت المصلحة واثرت في العواطف والعلاقات الإنسانية كثيرا وبصفة خاصة في الآونة الأخيرة وقد تناولت الدراما التليفزيونية هذا الموضوع في أكثر من عمل الا ان ما لفت انتباهي عمل سبق عرضه في التليفزيون المصري وهو تحت عنوان نصيبي و قسمتك حيث تناول هذا الامر بأسلوب جميل اظهر المشاعر الإنسانية الحقيقية لبطل العمل الفنان هاني سلامه وتحكى الحلقتين الذين تناولوا هذا الموضوع بان الفنان هاني سلامه كان اسمه "رائد" وعنده شركه كبيره وناجحة وحب يعرف بيحصل ايه في الشركة من وراه، كان واثق جدا من ان الناس كلها بتحبه لكن كان عنده حب استطلاع يعرف كل صغيره وكبيره بتحصل ..
فقرر ان يراقب الشركة كلها بالكاميرات بالصورة والصوت، وجاب مهندس ودفع مبلغ كبير جداً عشان يركب كاميرات في كل مكتب في الشركة..
اكتشف ان كل الناس اللي كان بيثق فيها ثقه عمياء بيتكلموا عليه كلام سيء جدا من وراه.. ومحدش بيحبه حب صادق عكس ما كان يتوقع حتى الإنسانة اللي كان هيتجوزها طمعانه فيه وكل اللي بيثق فيهم في الشركة بيطعنوه في ظهره وبيحقدوه عليه وعلى نجاحه..
وطبعا نتيجة ذلك ثقته في الناس اللي بتشتغل معه انعدمت، في نفس الوقت حصل كذا موقف من اخته ضايقه وحس انها مش صافيه له فقرر يعمل كده كمان في بيته ، ويشوف ويسمع كل كلمه بتتقال فيه والكارثة انه اكتشف ان اخته بتحقد عليه جدا ، وبتغير من نجاحه وطمعانه في فلوسه وبتتآمر هي وجوزها عليه من كتر حقدهم وغيرتهم منه .
متخيلين قد ايه بشاعة الموقف!!
واحد عايش في سلام بيحب الناس ومتخيل انهم بيحبوه ، ولما يفتش ويدور يكتشف انه موهوم ومخدوع ..
قد ايه حاجه صعبه ان الواحد يكتشف فجأه ان كل اللي حواليه لابسين وشوش حتى أقرب الناس له..
عارفين.. القصة دي فعلا ليها هدف وحكمه، وهي ان ربنا منحنا نعمه كبيره، نعمة اننا لا نعلم ايه بيتقال من ورا ظهرنا ، نعمه اننا منعرفش كل حاجه ..
والمفروض حتى لما نشك ان فيه حاجه بشعة بتحصل من ورانا منسعاش اننا نعرفها.. عشان منتصدمش ونتوجع..
مشكلة " رائد" كلها انه سمع اكتر من اللازم، سمع حاجات مكنش لازم يسمعها.. هو كان بيسمع ويشوف اللي كان المفروض يشوفه ويسمعه لكن هو فضل يدور ويبحث وكانت النتيجة انه خسر حياته ودمرها وفقد ثقته في الناس كلها ومبقاش عارف يعيش وفي اخر الحلقات قال وهو مدمر وحزين
" يارتني ما شفت ، يارتني ما عرفت "
الحمد لله علي نعمه اننا منعرفش ايه بيتقال من ورا ضهرنا ..ولا نعرف جوا نفوس الناس ايه لينا ..
هكذا هي المشاعر الحقيقة للمحيطين بك ترى ابتسامة في الوجوه تخبا حقد دفين في القلوب وربما تبغض أحدا يحمل لك الكثير من المودة والحب فعليك ان تعيش بطبيعتك وبحسن نيتك مع باقي البشر وتحاول ان تتقرب من الله بأعمالك الحسنة المليئة بالخير وثق تماما بان من يحبه الله يعشقه البشر ويحاولون ان يتقربون منه وخليك عايش في سلام أحسن ومتخيل ان كل الناس كلها تحبك
وفقنا الله واياكم لما فيه الخير
|
